25/09/2026
Actualizado a las 14:42h.
Batmanek agur esan dio NBAri. Nicolas Batumek, 37 urterekin, 18 urteko karrera amerikarrari amaiera eman dio. Frantziako hegalak bere semearekin egindako bideo hunkigarri baten bidez eman du agurraren berri. Ia hamar minutuko grabazioan azaldu zion haurrari zergatik iritsi den kantxetatik aldentzeko unea.
«Zure aitak saskibaloian jokatzeari utzi dio», esan zion semeari Pont-l 'Évêquen grabatutako bideoan. Herri horretan hasi zen Batum saskibaloian jokatzen, txikitan. «Aspalditik jokatu dut. Etxera itzuli eta zurekin egon nahi dut. Zaintzeko eta besteentzako lekua egiteko unea da», azaldu zuen.
Erabakiaren data ere ez zen kasualitatea izan. Irailaren 21ean argitaratu zuen bideoa, hain zuzen ere bere aita, Frantziako saskibaloi jokalari profesionala, kantxa batean hil zen egun berean. «Nire karrera amaitzeko unea iritsi dela onartu behar dut», esan zuen.
Batumek 2008an egin zuen NBAra jauzia, Portland Trail Blazers taldeak Draftaren 25. aukeran hautatu zuenean. Ezizena, Batman, jauzi egiteko erraztasunagatik eman zioten. Hegan egiten zuela ziruedien. Oregonen zortzi denboraldi egin zituen, eta 2014ko play-offetan izan zuen bere ibilbideko unerik aipagarrienetako bat. Damian Lillard eta LaMarcus Aldridgeren alboan zituela, Portland Mendebaldeko Konferentziako finalerdietara iritsi zen.
2015ean Charlotte Hornets taldearekin fitxatu zuen, eta bertan bere mailarik onena erakutsi zuen. 2016-17ko denboraldian 15,1 puntu, 6,2 errebote eta 5,9 asistentzia lortu zituen partidako. Ondoren, Philadelphia 76ers eta Los Angeles Clippers taldeetan ere jokatu zuen. Azken denboraldian, Clippersen, 74 partidatan aritu zen, gehienetan ordezkoen aulkian eserita, 4 puntu eta 2,5 errebote batez beste eginda.
NBAz gain, Batumek ibilbide luzea izan du Frantziako selekzioarekin. Kapitaina izanik, bi zilarrezko domina olinpiko irabazi zituen, Tokioko 2021eko eta Parisko 2024ko Jokoetan. 2013an, gainera, Europako txapeldun izan zen Frantziarekin. Horrela, bere belaunaldiko jokalari frantziar garrantzitsuenetako batek agur esan dio saskibaloi profesionalari.
Historiarako geratuko da Tokioko Jokoetan Esloveniako Prepelic-i jarritako txapela. Finalerdietako azken jokaldia zen, Frantzia puntu bat gora Doncicen taldearen aurka (90-89). Bat-batean, Prepelic saskiraino sartu zen; jaurtiketa erraza besterik ez zuen egin behar, baina Batumek aurreikusi egin zuen jokaldia. Bi pauso azkar eta salto eginda, sekulako txapela jarri zion taularen kontra. Au revoir, Batum!
- Euskera
- Harmailatik (Sergio Eguia)